МКҚК «Бүлдіршін» бөбекжайы

«Балапан» кіші тобының «Ардақты анашым» атты ертеңгілігі

Зал іші әсем безендірілген. Музыка әуенімен балалар қол ұстасып залға кіреді.

Жүргізуші: Құрметті қонақтар,аяулы аналар,қыздар! 8 – наурыз мерекелеріңіз құтты болсын! Көктемнің шуақты күніндей,сан алуан гүлдеріндей құлпырып,жайнап жүре беріңіздер! Жүздеріңізден  шаттық, көңілдеріңізден қуаныш арылмасын.

Той пердесін ашайық,

Тойға шашу шашайық.

Аналарды құрметтеп,

Ән маржанын шашайық!

Ән: «Анашым»

Музыка әуенімен Көктем кіреді.

Көктем:

Мен көңілді көктеммін

Былтыр келіп кеткенмін.

Көзін ашып бұлақтың,

Түбіне тал еккенмін.

Жүргізуші: Амансыз ба, Ару Көктем! Біздің ертеңгілігімізге қош келдіңіз!

Көктем: - Сәлеметсіздер ме,балалар, ардақты аналар!

Сағынышпен жеткен,

Келді  міне Көктем

Жайнап нұрлы гүлі,

Мерекеңіз бүгін

Құтты болсын,аналар!

Жүргізуші: - Ару Көктем,біз сенің келгеніңе өте қуаныштымыз. Балалар күннің шұғыласын, судың сылдырын сағынды. Балалар сізге ән айтып,би билеп береді.

Жүргізуші: Қане,балалар,орнымыздан тұрып, биімізді билейік

Би:  «Көктем гүлдері»

Көктем:-Рахмет,балалар. Енді мен сендермен бір ойын ойнағым келіп тұр.Ойын «Кім гүл тереді?» деп аталады.Музыка ойнаған кезде гүлдерді тездетіп, себетке салуымыз керек.

Ойын: «Кім гүл тереді?»

Көктем:- Балалар,сендер өте өнерлі екенсіңдер. Би де билеп,ән де айтады екенсіңдер.Сендерге көп рахмет. Сендермен уақытымды көңілді өткіздім. Ал енді менің кететін уақытым болды. Сау болыңыздар!

Жүргізуші:

Құтты болсын осы шаттық күніңіз

Бақытты да ұзақ өмір сүріңіз

Қуанышты жүзіңізбен әрдайым

Бұл өмірде күліп қана жүріңіз.

-Құрметті қонақтар,осымен өздеріңізге арналған ертеңгілігіміз аяқталды. Әрдайым көктем гүліндей жайнап жүре беріңіздер!